Waxaa soo ifbaxay warbixin cusub oo ay soo gudbiyeen saraakiil ka tirsan laamaha amniga magaalada Muqdisho, taas oo muujinaysa cabsi xooggan oo laga qabo weerarro ay qorsheynayaan kooxaha Al-Shabaab. Ilo xog-ogaal ah oo la hadlay Qaran24 ayaa sheegay in digniino dhowr jeer la gudbiyay, balse aan laga qaadin tallaabo degdeg ah, taas oo dhalisay walaac weyn oo ay muujiyeen dadka magaalada ku nool iyo saraakiisha ka shaqeysa amniga.
Digniino Hore Oo Aan La Maqlin
Saraakiisha ayaa tilmaamay in dhacdadii 5-tii Oktoobar 2025, ee la isticmaalay gaari loo ekeeysiiyey midka dowlada ay leedahay oo lagu weeraray Godka Jilicow, aysan aheen mid lama filaan ku ahaa hayadaha maanka gudaha laakin hore loo ogaa in ay dhicikarto.
Sarkaal magaciisa qariyey ayaa yiri “Waxaan hore u soo gudbinay digniin cad oo ku saabsan dhaqdhaqaaqyo laga dareemay gudaha magaalada iyo warawareerta gudaha al shabaab laga helayey , balse cid na dhageysatay ma jirin,” ayuu yiri sarkaal ka tirsan sirdoonka gudaha.
Digniinta maanta ay soo saareen ayaa sarkaal magaciiisa qariyey Wuxuu intaas ku daray in maanta waddooyin badan la furay iyadoo aan si buuxda loo sugin amniga baabuurta sharkadaha ay leeyhiin , taas oo keeni karata in shirkadaha iyo hay’ado waaweyn ay si sahlan uga gudbaan baraha kantaroolada, iyadoo ay suuragal tahay in kooxaha argagixisadu ka faa’iideystaan.
Qorshaha Cusub Ee Al-Shabaab
Warbixintu waxay muujisay in Al-Shabaab ay qorsheynayaan in ay si xeeladaysan u adeegsadaan baabuurta shirkadaha waaweyn sida IBS Bank, Hormuud Beeco, Hayat Market iyo kuwo kale, si ay ugu dhex gudbiyaan walxaha qarxa magaalada. Sarkaal kale oo amni ayaa yiri:
“Waxaa jirta cabsi dhab ah in baabuurta ganacsiga loo isticmaalo qaraxyo, si loogu dhufto meelaha dadku ku badan yihiin ama xarumaha dowladda.”
Saraakiishu waxay soo jeediyeen in baaritaan joogto ah lagu sameeyo baabuurta shirkadahaas, shaqaalahooda, iyo agabka ay la socdaan. Waxaa la soo jeediyay in la sameeyo xog ururin usbuucle ah oo ay helaan dhammaan ciidamada jooga baraha kantaroolada amniga, si la isugu gudbiyo xog dhameystiran. Tusaale wwa darawalksta rootka uu mar iyo o gaariga magaciisaa meesha uu ka shaqeeyo yaqaao dhamaan warbxinta kujira system ka dowlada.
Ambalaasyada Iyo Isbitaallada Oo La Xaqiijinayo
Waxaa sidoo kale lagu taliyay in dhammaan ambalaasyada ka howlgala Muqdisho laga diiwaangeliyo isbitaallada ay hoos yimaadaan, lana diyaariyo xog faahfaahsan oo ku saabsan shaqaalaha, darawallada iyo meelaha ay si joogto ah u aadaan. Tani waxay ka hortagaysaa in kooxaha argagixisadu u adeegsadaan gaadiid caafimaad sidii gaadiid qaraxyo lagu gudbiyo.
Caqabadaha Nidaamka 4.5 Ee Hay’adaha Amniga
Saraakiisha warbixinta soo saaray ayaa si adag u dhaliilay nidaamka 4.5 ee lagu shaqaaleysiiyo hay’adaha amniga, iyagoo sheegay in uu dhaawacay waxtarkii iyo kalsoonidii bulshada. Mid ka mid ah saraakiisha ayaa yiri:
“Amniga Muqdisho laguma ilaalin karo nidaam qabiil. Ma aha in shaqooyin muhiim ah lagu siiyo qof reer hebel ah oo aan aqoon iyo khibrad lahayn.”
Baaq Loogu Yeerayo Tallaabo Degdeg Ah
Saraakiisha waxay ugu baaqeen madaxda dowladda iyo laamaha amniga in ay qaadaan tallaabo degdeg ah, lagana shaqeeyo ilaalinta shacabka iyo hantida guud.
Haddii aanan nidaamka amniga dib loo hagaajin, magaalada waxay geli doontaa marxalad cusub oo khatar ah,” ayay ku dareen.
Digniinta maanta la iska indha tiro waa musiibada berri.
Warbixintan waxaa lagu soo ururiyay xog rasmi ah oo ka timid saraakiil gudaha u ah hay’adaha amniga Muqdisho, kuwaas oo ka cabanaya in codkooda aan la maqlin – balse ka digaya qatarta sii soo dhowaaneysa ee magaalada.
