Diyaarada Egypt Air ayaa duulimaadyo caalami ah ka bilowday Muqdisho.
Diyaaradda Egypt Air ayaa duulimaadkeedii ugu horreyay maanta ku timid caasimadda Muqdisho , iyadoo munaasabad lagu daahfuray duulimaadka Egypt Air lagu qabtay garoonka caalamiga ah ee diyaaradaha Aadan Cadde.
Daahfurka duulimaadka Egypt Air, waxaa ka qaybgalay wafdi sare oo ka socday dawladda Masar oo uu hoggaaminayay Wasiirka Arrimaha Dibadda iyo Socdaalka Masar, Badr Abdel-Aty oo uu weheliyay Wasiirka Duulista Masar, Sameh Al Hafny iyo saraakiil kale oo ay ku qaabbileen Muqdisho Wasiirka Arrimaha Dibadda iyo Iskaashiga Caalamiga ah ee Soomaaliya, Axmed Macallin Fiqi oo ay wehelisay Wasiirka Gaadiidka iyo Duulista Hawada Soomaaliya , Fardowsa Cismaan Cigaal, iyagoo yeeshay wada-hadallo lagu xoojinayo xiriirka iyo iskaashiga labada dal.
Egypt Air, ayaa noqonaysa diyaaradda 9 aad oo caalami ah oo duulimaadyo toos ah ku timaada caasimadda Muqdisho, taa oo fursad u siinaysa muwaadiniinta Soomaaliyeed inay helaan khadad dhow oo ay ku gaari karaan adduunka oo dhan.
