Wadahadalladii Soomaaliya & Itoobiya oo natiijo-la’aan ku soo dhammaaday
Dowladda Turkiga ayaa magaalada Ankara ku casuuntay Wufuud kala matalaysa Soomaaliya iyo Ethiopia
si looga wadahadlo xiisadda taagan.
Kulamada labada dhinac ma ahayn kuwa fool ka fool ah maadaama ay Dowladda Soomaaliya meel adag ka taagantahay qaddiyadda la xiriirta ilaalinta Midnimada iyo Madaxbanaanida Qaranka, inkastoo gabagabadii shirka ay goobjoog ka wada ahaayeen labada wafdi warmurtiyeed wadajir ah oo uu soo jeediyey dhexdhexaadiyaha Wasiirka Arrimaha Dibedda Dalka Turkiga.
Kulankaan oo ahaa kii koowaad ayaa soo gabangaboobay, waxaana lagu balamay wareeg labaad oo wadahadal ah 02 September 2024.
Wadahadalka ayaa si weyn loogu kala aragti duwanaa, gaar ahaan Dowladda Soomaaliya oo mowqifkeedii hore ee ahaa in Dowladda Ethiopia ay ka noqoto MOU-gii sharcidarrada ahaa ku adkaysatay iyo in aan wax gorgortan laga galeyn ilaalinta Madaxbannaanida dhuleed ee Dalkeenna oo u ah dowladda Soomaaliya lama taabtaan.
Dowladdu waxa ay u mahadcelinaysaa Dowladda Walaalaha ah ee Turkiga kaalintooda wanaagsan ee ay ka qaateen xasiloonida geeska Afrika.
Wasiirka arrimaha dibadda ee dalka Turkiga Hakaan Fiidaan ayaa sheegay
in horumar wacan laga sameeyey wada hadalladii dhex maray dalalka Soomaaliya iyo Itoobiya
kuwaas oo Ankara lagu dhex dhexaadiyey.
