Kooxda Khawaarijta Al-Shabaab ayaa saaka weerar ismiidaamin ah ku soo qaaday ciidanka ku sugnaa magaalada Ceeldheer ee gobolka Galgaduud, Soomaaliya. Weerarka ayaa ka koobnaa afar kooxood oo ismiidaamiyeyaal ah, kuwaas oo isku ekaysiiyey reer guuraa xoolahooda iyo carruurtooda wadata, sida ay sheegeen saraakiisha ciidanka dowladda.
Ciidanka qaar ayaa ku jiray tukashada salaadda subax markii askarigii waardiyaha amray in dadkii xoolaha watay dhinac maraan ciidanka. Laakiin mid ka mid ah kooxdii ismiidaamiyeyaasha ayaa halkaas isku qarxiyey, taas oo dhalisay in qaraxyo kale iyo rasaas goos ah ay bilowdaan.
Ciidanka oo hore ugu diyaar garoobay khiyaamooyinka khawaarijta ayaa si dhaqso leh uga jawaabay weerarka, iyaga oo toogtay dhammaan kooxdii weerarka soo qaaday. Al-Shabaab waxay weerarro nuucan oo kale ah hore uga geysan jireen magaalada Muqdisho, hase yeeshee markii dambe la soo afjaray kooxihii magaaladaasi ka hawlgeli jiray.
Weerarka maanta lagu qaaday Ceeldheer ayaa ka duwan kuwii hore ee Al-Shabaab, maadaama aanay markan soo wadan ciidan aad u badan oo cagta mariya ciidanka iyo xeryahooda. Halkii ay ka geysan lahaayeen weerar toos ah, waxay adeegsadeen ismiidaamiyayaal weeraray xarumaha ciidanka dowladda.
