Nairobi, 2-da Oktoobar 2025 — Magaalada Nairobi ayaa lagu qabtay shir ay ku kulmeen hoggaamiyeyaasha Jubaland, Puntland iyo xubno ka tirsan Madasha Samatabixinta Soomaaliya. Shirkan oo socday muddo kooban ayaa lagu soo saaray war-saxaafadeed sheegaya in la dhisayo “Golaha Mustaqbalka Soomaaliya”, lana qaban doono shirar siyaasadeed oo kale gudaha dalka.
Hase yeeshee, war-saxaafadeedkan ayaa si weyn u abuuray dood sharci iyo siyaasad, iyadoo uu muran ka dhex dhaliyay bulshada Soomaaliyeed. Sida uu sheegay Qareen Abdullahi Yabarow, oo wareysi gaar ah siiyay Qaran24, “Go’aannada lagu sheegay Nairobi waa sharci-darro, waxayna si cad uga hor imaanaysaa Dastuurka Ku-meel-gaarka ah ee Jamhuuriyada Federaalka Soomaaliya.”
- Qodobada Lagu Murmay
• Dhismaha Golaha Mustaqbalka Soomaaliya
• Qabashada shirar siyaasadeed oo gudaha dalka lagu qabanayo
• Baaqyo ku saabsan midnimo qaran
• Mahadcelin loo jeediyay dowladda Kenya
“Kooxaha mucaaradka ee maanta arrimahan ku dhawaaqay waxay marar badan ku celin-celinjireen in dowladda federaalka lagu noqdo Dastuurkii 2012, balse maanta iyaga ayaa si cad ugu tuntay qodobadiisa,” ayuu ku nuuxnuuxsaday Abdullahi Yabarow.
Falanqayn Sharciyeed
- Qarannimada iyo Madaxbannaanida (Qodobka 7)
Dastuurka wuxuu qeexayaa in Soomaaliya tahay jamhuuriyad mideysan oo leh madax-bannaanida siyaasadeed iyo dhuleed sida uu sheegay Abdullahi Yabarow, shirar siyaasadeed oo lagu qabto waddan kale iyadoo aan oggolaansho laga haysan dowladda federaalka Somalia waa ku xadgudub madaxbannaanida qaran.
- Dhismaha Gole Cusub (Qodobka 55)
Golaha Shacabka iyo Aqalka Sare ayaa ah kuwa kaliya ee awood u leh sharci-dejin iyo dhismaha hay’ado qaran, sidaas darteed, “Golaha Mustaqbalka” waa mid sharci-darro ah oo aan lahayn saldhig dastuur.
- Siyaasadda iyo Amniga Qaranka (Qodobka 54)
Awoodaha siyaasadda dibadda, difaaca iyo amniga qaranka waxay si gaar ah ugu qoran yihiin dowladda federaalka. Sida uu caddeeyay Abdullahi Yabarow, war-saxaafadeedkii Nairobi wuxuu ku tuntay qodobkan isagoo ka hadlay arrimo amni iyo siyaasadeed oo aysan dowlad-goboleedyo awood u lahayn.
- Midnimada Qaranka (Qodobka 3)
Dastuurka wuxuu farayaa ilaalinta midnimada iyo wadajirka shacabka Soomaaliyeed. Sida uu sheegay Yabarow, shirar gaar ah oo lagu qabto dibadda waxay keeni karaan kala qaybsanaan iyo khatar siyaasadeed.
- Awoodaha Federaalka iyo Dowlad-goboleedyada (Qodobka 53)
Qodobkani wuxuu caddaynayaa in awoodaha aan si cad loogu qorin dowlad-goboleedyada ay u gaar yihiin dowladda federaalka. Sida uu sharaxay Yabarow, “Gobollada ma laha awood sharci ah oo ay ku dhisaan gole qaran ama ay ku qeexaan mustaqbalka dalka. Tani waa sharci-darro cad.”
- Doorka Kenya iyo Xeerarka Caalamiga ah
War-saxaafadeedka ayaa mahadcelin gaar ah u jeediyay dowladda Kenya, taas oo su’aal gelinaysa madaxbannaanida siyaasadda gudaha Soomaaliya. Sida uu xusay Qareen Abdullahi Yabarow, “Doorka Kenya wuxuu si cad uga hor imaanayaa mabda’a madax-bannaanida qaranka iyo qawaaniinta caalamiga ah ee ku xusan Qodobka 2(7) ee Xeerka Qaramada Midoobay, kaas oo mamnuucaya faragelin arrimaha gudaha dal kale.”
- Talo Sharciyeed oo uu Soo Jeediyay Yabarow
Khabiirka sharci Abdullahi Yabarow wuxuu ku taliyay in dowladda federaalka ay qaaddo talaabooyin cad oo sharci iyo siyaasadeed:
• In Wasaaradda Arrimaha Dibadda ay qaaddo tallaabo diblomaasiyadeed oo looga jawaabayo faragelinta Kenya.
Wareysigii uu bixiyay Qareen Abdullahi Yabarow wuxuu iftiimiyay in war-saxaafadeedkii Nairobi uu yahay sharci-darro, khatarna ku ah midnimada iyo madax-bannaanida Soomaaliya. Qodobada dastuuriga ah sida 3, 7, 53, 54 iyo 55 ayaa si toos ah uga hor imanaya war-saxaafadeedkan.
“Sharciga iyo dastuurka waa kan ugu sarreeya, cidna kama sarreyso. Waa arrin ceeb ah in mucaaradkii ku celin jiray in dowladda lagu noqdo dastuurka 2012 ay maanta iyagu ku tuntay qodobadiisa. Mustaqbalka Soomaaliya waxaa go’aamin kara shacabka iyo goleyaasha dastuuriga ah, balse ma aha shirar dibadeed oo sharci-darro ah,” ayuu ku soo gabagabeeyay Qareen Abdullahi Yabarow.
